لحك وغطاه الجزء السادس عشر

لحك وغطاه  الجزء السادس عشر

لحك وغطاه  الجزء السادس عشر

خوتنا وصلو بزربة هاد نسيب المستقبلي عندي طلع باغي غير يتهنى من دري جابو لعندي طيارة، لمهم حليت ليهم لباب سلمت عليهم كيباليا دري ضريف ولكن منتيقش معمري غنعاود نحكم على بنادم وندير تقة وأنا مزال محليتش حتى حريرة دوك تصاور. سيد غير جاب دري وبغا يمشي قلت ليه بقى تشرب شي حاجة جاوبني بلي عندو شي خدمة وخاصو يرجع لتما بزربة قالي منبعد ونهضرو. خرج بقيت أنا وخونا سلام سلام تعارفنا منين جاي شنو كنتي كدير.. وصلات لوقيتا ديال لصال بدلت حوايجي غادي خارج مشيت لعندو بعدا دويت معاه تلاجة عامرا كلشي كين فدار عطيتو نمرتي باش حتى إلا وقعات شي حاجة يعيطلي كنفهمو فصواب حنا، خرجت وديك ليلة لي زعما راد لبال مع وجهي كتر ومخبيه عاد كليتها فحاجبي مجيت فين نخرج ونطلع مع نوح حتى تنفخات ديك لبلاصة وبدات كتزراق وصلنا لدار قاليا صبر معرفتش علاش كيقبل فطوموبيل بقيت كنتسنى شويا وهو يهبط هاز فيديه زيزوار خلعني شنو غدير بهدا؟؟ قاليا دم مجموعلك تما غادي يخصها وقت باش تبرى فايتلي تضربت بحال هكدا غادي نحلها باش تتفش..

 تحلها؟؟ راه عيني هادي أولد لحاجة. بقا كيجر فيا قاليا جرحة رقيقة مغتبانش، صافي خليتو هو كيعرف حسن مني تانا مبغيتش ندخل لدار وعيني مسدودة. غدا منعرف كيفاش تصبح تاني إلا بقات هكدا.. دوز ديك زيزوار جرحة صغيرة بحال رحمة ربي بدا داكشي كيخرج شاد عليها فوطة غادي طالع وهو يتبعني قلت ليه فين غادي سير حتال غدا قالي نخليك هكدا ونمشي لالا ميمكنش غنطلع معاك شويا. بقيت كنشوف فيه واش عندك انفصام شخصية ولا غير كتضحك عليا نتا كتهدد فمي بتصاور وبلي غتشوهني وفنفس لوقت كتمتل عليا بلي خايف عليا حرت معاك شد وجه واحد.. بقا لاصقني قلت ليه عندي ناس معايا فدار مبغيتهمش يعرفوني فاش خدام قاليا وخا لي بغيني ومشى..

 طلعت لدار لقيت دري لي معايا ناعس غيكون عيان من سفر تانا غسلت وجهي داويت ديك جرحة ونعست لغد ليه فايق على صوت دقان فباب بيتي بكريي فايق مڭلوب أول حاجة قلتها هيا خليني ناعس غي واحد شويا، دري كيحساب ليه داوي معاه أنا راه عند بالي داوي مع لواليدة دازت واحد دقيقة عاد عقلت على راسي خرجت لقيتو بارك تيفطر هادشي علاش كان كيدق عليا..

 لركنا كنفطرو شاف لفاصمة فعيني وهو يسولني كيفاش وقعلك قلت ليه غير طحت على طابلا فلخدمة ماشي شي حاجة بقينا باركين شويا كنهضرو عاد خرجت قاري ديك ساعة دخلت معامن كنتلاقا فلباب لمدير تاهو سولني عطيتو نفس لكدبة قاليا رد بالك وبقا كيسول فيا شويا على دراري لي خدام معاهم واش غادين مزيان ولالا.

 صافي خليتو دخلت لحصة لي عندي بارك غير كنرتاح وليت كنمشي نرتاح ماشي نقرى تما وهيا تبرك حدايا آية ماشي لحصة ديالها هادي صباح لخير صباح الخير طبعا تاهيا غتسولني على عيني ومغاديش تيق بالكدبة لي من صباح وأنا نعاود فيها قالت ليا طيحاتك وزلقاتك بداو كيكترو خاصك ترد لبال شويا.. باركين تنهضرو نسينا راسنا حنا فين ولمشكل كنهضرو بدارجة محسيت حتى لقيت كلشي كيشوف فينا حتى من لأستاذ قاليا سمحليا واش قاطعناكم نخرجو حتى تساليو؟بديت كنضحك معاهم تانا وصافي قمعة خيبة اللهم تقلبها ضحك قلت ليه سمح ليا كملنا لحصة خرجنا لديك لقاعة أنا وياها باركين كنتسناو فدوك الأخرين يجيو وهيا تعيط لواليدة فديك دقيقة وفيديو شحال مشفتها وخا مضروب فوجهي منقدرش نقطع عليها جاوبتها كيف شافتني بدات كتسول تاهيا قلت ليه غير طابلا قالتلي وخا حيد لفاصما و وريني نشوف كيف دايرا.. لواليدة مغاديش ندوزها عليها خدمتها هادي كان خاصني نبدل لموضوع قلت ليها وصافي دبا باغي نعرفك بواحد لبنت..

 درية صدمتها وجها تبدل ليه لون بدات كتدور فراسها يمين وشمال وااابنت ناس علامن كتقلبي راه كين غير أنا ونتي هنا. لواليدة عندي وخا قارية وكلشي راه (old school) وكتفهم فصواب خليتهم كيهدرو بزوج هاح فلت منها هاد لمرة لحاجة لوحيدة لي تقدر تلف لواليدة شويا على وجهي هيا هادي بداو دراري كيدخلو لقاعة قلت للواليدة خاصني نقطع حتال من بعد ونهضرو.. خرجنا بحال ديما كنتسناو باها حتى جا ناريييي تاهو بدا يسول برب ويسولني شي واحد أخر حتى نوضها معاه مرضوني،داني معاهم لدار عرض عليا مقديتش نقول لا أصلا كنت معول مغاديش نمشي مع نوح ديك ليلة حتى تبرالي عيني شويا مباغيش نزيد عليها. كتبت ليه مساج وطفيت تيليفون موراها بالخف دوزت ديك لعشيا معاهم موصلني باها فليل لدار وكيشكر فيا وكيوصي فيا حضي راسك وإلا حتاجيتي فلوس جي عندي متحمش مني دير بحالا باك هنا. كيفاش لواليد؟؟ لا أسيدي من هادي غتولي تقوليا بنتي بحال ختك ونولي فشد ليا نقطعلك طبعا هادشي غير فخاطري فديك لحضة لدار كتباليا طوموبيل ديال نوح محطوطة تما ومكينش فيها 100% غيكون طالع لفوق نزلت بزربا نطلع نشوفو شنو كيدير وشنو كيقول لدري لي معايا لحية تابعني فدروج قاليا غنطلع نشوف حميد كيفاش داير قبل منمشي.. وحصلااا هادي تنحل لباب ويديا كيلعبو صافي نسوبيا راحت فكلام فاحش نوح غيشوهني مع ناس هادشي إلا مكانش دبا أصلا وراا تصاوري لدري لي فدار، حليت لباب لقيتهم باركين بزوج وكيضحكوو..

 سلم على لحية وهو يشوف فيا مغتعرفناش؟؟ قلت ليه هدا نوح صاحبي.. باركين ب4 وصقييل ياكما هدا هو الهدوء لي كيسبق لعاصفة يديا عرقو نوح وهو يسولني كيف بقات عيني قلت ليه بيخير ياك بعدا طابلا متهرتش؟ بقا كيشووف فيا عاد فهمها قاليا أااه أه خاصك تحضي مع لأرض فاش تكون يلاه مغسولا. خرجت أنا ونوح وبات لبنت وصلناه هو بعدا لطوموبيل ديالو غير طلع تحرك وأنا ندور فنوح واش نتا مريض تجي لدار بلاما تعلمني باغي دير ليا شي مشكل من غير ل1000 لي ديجا دايرلي قلتلك ليوم مغنجيش هيا خليني نرتاح.. كنغوت عليه تما طلعت عيني تيباليا لولد لي معايا فدار تيطل طالق ودنو بقيت كنشووف فيه حتى مرڭ ودخل راسو. نوح جاوبني ياسين جيت غير نشوفك واش بيخير ولالا وكيف بقات عينك. بقيت كنشووف فيه والله حتى مريض هاد ساط فدماغو ميمكنش يكونو هاد زوج وجوه عند بنادم طبيعي.

 سيد كيباليا ماشي لخاطرو بردت معاه قلت ليه بيخير غدا غنكون معاك دبا غنطلع نرتاح ممكن؟ خلاني وتحرك طلعت تانا لدار نرتاح هاد لعام معمري غندوز بحالو فحياتي إلا ممتش فيه معمري غنموت أنا وليت كنتصدم فاش كنفيق صباح عادي بحالي بحال بنادم يمكن دعاوي لواليدة مستجابين عارفها كدعي معايا لمهم داك نهار أول مرة غنهضر مع ديك بنت ناس بحال شي كوبل وشدينا فيدين بعضياتنا صافي نهار دايز زوين قلت ليلة غتوقعلي شي حاجة انا راه وليت حافظ زهري إلا دار معايا لمزيان بنهار كينعس ويخليني بليل ولعكس تاني لمهم مشينا باش داخل واقف تما شكوون كيدخل معايا داك صلع لي كان مع نوح شحال هادي غير شفت وجهو بداو كيضروني عضومتي تاني عرفتي بلاما نحس لقيت رجليا كيتحكو خرجت من تما مالني معندي عقل نلعب معاه تاني بنادم بدا بديك هوووو وقفت حدا نوح كنتسناه شنو غيقوليا بعدا هاد لمرة مزير لوقفة باش ميحاولش يدفعني تاني.. سيد وهو يحيد جاكيط ديالو مدها ليا قاليا تفرج..(يتبع2k)