لحك وغطاه الجزء الخامس عشر

لحك وغطاه  الجزء الخامس عشر

لحك وغطاه  الجزء الخامس عشر

لخلعة سيد فاش غادي يكون باغيني وشنو لحاجة لي تخليه يتسناني تال هاد لوقت ولمشكلة أنه باينا فيا كنت مطايف وضربة فحاجبي باينة غيبدا يسول فيا مالك وفين وأنا منقدرش نقول ليه باغي نخلي ديك صورة زوينة ديال دري نقي لي جاي يقرى وخدام بما يرضي الله.. ضربة دورة عالمية لباب تاني طلعت لدار غسلت وجهي طليت تيباليا مزال كيتسناني ضربت كاسكيطة هبطتها على عينيا شويا وقبية فوقها عاد نزلت خرجت من نفس لباب زعما راه يلاه جاي درت براسي مشفتوش غادي قاصد لباب وهو يعيطلي قاليا ياسين ولدي سلام..سلمت عليه وعرضتو يطلع لدار معاودش معايا لهضرة طالعين وداوين قاليا كتعطل بزااف فلخدمة وطريق خايبة رد بالك ولا بدل لخدمة أخرى.. أنا داير فيها ضريف وصباار راه نسيب هدا إلا مصبغتوش شكون غنصبغ دخلنا لدار قلت ليه شعل تلفازا ورتاح دخلت للكوزينة عصرت ليه واحد لقهوة دايزها لكلام عاد بركنا بدا كيسول فيا بشحال كاري و واش كين صداع فهاد لعمارة أنا كنجاوب ومعارفوش لاش باغي يوصل وهو يسولني تاني واش مساكن معايا حتى واحد و واش كيجيو عندي صحابي ولا صحابات فلبلاصة جاوبتو أححم ألا أعمي حنا ماشي ديال داكشي كنحشمو حنا لمدرسة لخدمة دار معنديش تا لوقت..

 قاليا إوا غادي نطلبك واحد طليبة ومتقولش ليا لا واحد لولد من لعائلة غادي يجي هاد الأيام عندو شي خدمة هنا وموصيني باه عليه نشوفلو فين يبقى وأنا عارفو برهوش شويا ومنقدرش نخليه معايا فدار كنخرج للخدمة كنتعطل وراك عارف مجاتش نخليه مع لمدام وآية، قلت زعما نسولك واش تقدر تخليه يبقى معاك غادي تعاونو بيناتكم ودراري غتفاهمو ونتا تبارك الله بعقلك غادي نرتاح من جيهتو إلا كان معاك.. أنا؟ بعقلي؟؟ سيد غاالط فيا، كنت غادي نقوليه يسمح ليا باغي نبقى بوحدي واحد راحتي هكدا ولكن سيد قصدني وشحال وهو كيتسناني مجاتش نبان برهوش قدامو ونصغر بيه قلت ليه كلمتك هيا لكبيرة وملي من جهتك مرحبا وقتما جا أححح طلعت كنفهم فصواب. قاليا ماشي بزاف باش عرفتك ولكن كنت متأكد بلي مغترجعنيش لله يرضي علك فاش غيكون جاي غادي نعلمك نمرتك عند آية ياك قلتلو أه وهبطت معاه لطوموبيل حتى مشى كنفهمو حنا فصواب.. حتى طلعت لدار عاد تنادم معايا لحال تفوو أنا شنو داني نقول أه أنا مكنكونش فدار بزاف وحوايجي هنا وزيد بسباب هاد لخدمة مع نوح ديما كنرجع معطل وحالتي حالة سيد غيشوفني يقدر يشريلي صداع مع لحية هو راه مسوق حتى واحد فيهم فيا ولكن بروجولة عاجباني بنتو و واخد علية صورة زوينة حتال دبا هو وعائلتو مبغيتش نخصرها.. لمهم نخلي هاد لمشكلة حتال وقتها دبا وقت نوح وهادشي لي واقع ليا معاه ديك ليلة نعست معقلتش على راسي حتال لغد ليه فصباح يلاه خارج من دوش سمعت دقان خونا جايب فطور وقهوة مفهمت والو بركنا هو كياكل وأنا كنشوف فيه قاليا مالك واش ضروري نعرض علك؟ قلت ليه حلفت منبقا ناكل شي حاجة من جهتك مورا ديك ليلة. بدا كيحلف عليا واش منيتك انا راه كناكل معاك من نفس طابلة..

 بقا داوي مقديتش نبقا معكس فطرنا سولني فين غادي قلت ليه لمدرسة وهو يوصلني خونا باغي يتصالح معايا وصافي غنزيد نتبعصص شويا عليه وموراها غادي نقوليه إلا بغيتي نيت نتصالحو ونسمحلك مسح دوك تصاور ولفيديوهات ديك ساعة ملي غيمسحهم غادي تكون هضرة أخرة غادي ندمو على نهار لي عرفني فيه. لمهم دخلت قريت شويا ضربة دلبارح صابحا شويا تاواحد مجرى معاها حتى تلاقيت بديك بنت ناس غير شافت كمارتي بدات ناري مالك فوجهك؟ قلت ليها والو غير طحت من فوق سرير..

 هاد لأيام لي جايا خاصني نفكر فبزااف من هاد لكدبات لمهم كملت لحصة لي عندي معاهم خارجين وهيا تسولني واش مسالي حيت باها مزال مغاديش يجي واحد ساعتين أخرين وباغا تبدل تبدل لجو لقاتني تانا محتااج نبدل لجو مشينا لواحد ريسطو على لأقل مستافد مع داك نوح أنني مبقاش عندي مشكل فلفلوس مدوزين نهار زوين مشيت معاها حتال قدام لباب دلفاك فيك كتسنى باها خليتها وغادي لدار يلاه غندور مع دورة وهو يقوليا واحد راس صافي غتخليها بوحدها معرفتش يوقف عليها شي واحد ولا توقع ليها شي حاجة لا قدر الله وباها مزال مجاش أهيا أش هاد لأفكار وليتي كتخمم ليها بحال باها شنو كاع يقدر يوقع ليها راه قدام لفاك ودنيا عامرة، واقيلا بديت كنربي لكبدة بزز مني رجعت لعندها قالتلب مالك نسيتي شي حاجة؟ قلت ليها لا والو غير تنادم معايا لحال غنتسنى حتى يجي لوالد ديالك عاد نمشي لدارنا. درية زوينة زعما تاخد ديك 7 من 10 ديالها بوجها بلا ماكياج بلا والو ولكن فديك دقيقة دارت واحد ضحكة مديرهاش مولات 10 على 10 ناري لبرائة كون كانت بنادم موراها بقينا صقييل تا واحد فينا مهضر حتى وقف باها قاليا ياسين نوصلك معانا؟ قلت ليه لا مرة أخرى دبا باغي ناخد شي تقديا فطريقي وشي حوايج من لمصبنة. مشاو وأنا نتحرك تانا لدار أهيا واقيلا هاد لمرة دبصح طحتي فشبكة هادشي مموالفاش ليا ناريي غنولي رطيطب تانا وغنبدا نشري نونوسات حمرين مكتوبا فيهم (i love u) حتى كبرت يا ربي متشوهناش عطينا شي موتة مستورة..

 مشيت لدار يلاه بدلت حوايجي تاني وخرجت لصال نوح كيتسناني غير كنشوفو كنجمع ضحكة ولهضرة كنحسسو بلي غادي بروبو ماشي بنادم حيت هادشي لي باغي هو.. وصلنا لتما بغيت ننزل وهو يقولي صبر جبد واحد تيليفون أنا من شوفة لولا عرفتو ديال عشيرتو هو لي صوراتني بيه..

 خونا قدامي دخل لتصاور وراهم ليا ومسحهم يلاه غنقوليه واش كينين غير فهاد تيليفون؟ قاليا صافي رتاحيتي هانا هنيتك منها دبا مبقاوش عندها مزال عندي غير أنا وأنا كما قلتلك مغاديش نغدرك. مزال مكملهاش جريت ليه تيليفونها وتيليفونو حاطو فوق طابلو هبطت وأنا نخبطهم مع الأرض شخشختهم مزيااان برجليا وضربتهم طاحو فروڭار بزوج يلاه غنبدا نسب ليه فلعروق ونرجع لدار مرتاح وهو يبدا يضحك وجبد تيلي أخر من جيبو قاليا كنت عارفك غتدير شي حاجة بحال هكدا تصاور مزال عندي هنا وفكارت ميموار فدار. صدمني مبقيتش عارف شنو نقول هههههه ناري على فرشة قاليا متبقاش واقف مصمر زيد ندخلو ليوم غادي تخلص لكريستي تيليفون جديد فبلاصة لي هرستي أما أنا مسامحلك أصلا عندي ضوبل.

 داخلين وكيضحااااك عليا، ديك ليلة دازت زوينة من غير هاد لبلان دتيليفون بعدا راه متضربتش فوجهي وليت بحال شي درية ويلي وجهي لا هههه دبصح خايف على كمارتي زوينة من نهارها مفينا لي يزيدها شي ديكور وباش حتى ملي نرجع لدار لواليد ولواليدة ميبانش ليهم بلي شي حاجة مبدلا. تقريبا واحد زوج سيمانات نفس روتين تقريبا كل نهار نمشي لفاك نقرا نتلاقا بآية نخرجو نوصلها فين كتسنا باها يا نبقى معاها حتى يوصلوني معاهم ولا نبقى حاضيهم تا يمشيو من نفس لقهوة نرجع لدار يلاه نبدل نخرج لصال لعند نوح سيمانتين كل ليلة ومعامن لاعب معرفتش واش أنا لي مقود ولا الله كيحطني غير مع وحدين نقد عليهم. مورا ديك سيمانتين عرضني لحية للعشا بقا كيحلف عليا وخا قلت ليه بلي عندي خدمة قالي خود ليلة راحة راه بزاف علك.. من واحد ناحية عندو لحق خاصني نرتاح شويا إلا بقيت تابع نوح وخا نبقى هنا 20 عام معمرو غيقوليا برك رتاح، عيطتليه قلت ليه ليلة مغاديش نمشي عندي ميدار وباغي نرتاح.. 

بقا ساكت شويا عاد قاليا وخا صافي بعد غدا ونتلاقاو. ديك ليلة مشيت لعند دار آية دخلوني باركين وهو يقولي باها بلي داك لولد لي عاودلي عليه غادي يجي من هنا شي يوماين واش مزال مكين حتى مشكل يبقى معايا؟ قلت ليه عطيتك كلمة صافي وقتما جا مرحبا. شوف هاد خونا تاهو كيفاش داير فعقليتو على ما عاود ليا سيد حتال دبا راه برهوش إلا دار معايا شي بلان مغاديش نعقل عليه غنشير بيه هو وحوايجو من شرجم. ودازو دوك ليوماين بحال زوج دقايق حتى عيطلي لحية قاليا دري راه وصل معايا دبا غنمشيو يبرك معايا واحد ساعة فدار ناكلو شي حاجة وغنجيبو لعندك نتا غير فدار ياك؟ قلت ليه أه مرحبا بزز مكرهتش كون رجعت بالوقت شويا ونقول ليه لا أنا راه ولفت صقيل كنشعل ضو نطفيه وقتما بغيت نطيب منطيبش عندي زايد ناقص ماشي بحال معاك شريك فدار محسيتش بالوقت مزال بارك فنفس لبلاصة شاد تيليفون وكنتفرج حتى بداو كيدقو فلباب وصلو..(يتبع2k)