لحك وغطاه الجزء التاني عشر

لحك وغطاه  الجزء التاني  عشر

لحك وغطاه  الجزء التاني  عشر

سيد كيهضر بحالا داخلاه لموت وكيقوليا كسيدة صغيرة ديك صافي مبقيتش عارف واش نكمل طريقي نطلع لدار ولا شنو ندير ها وحدة من سلبيات تخوي لبلاد قلت ليه صافي غادي نرجع نشوفك وهو يحلفلي والله وتجي تا نسخط علك قابل قرايتك أنا راه بيخير، صافي ملي بيخير غنصوني لك فيديو وجاوبني قاليا ياسين مك بزز باش مخلياني نهضر غنعطك هضر معاها سير قابل قرايتك أنا راه معندي والو إلا جيتي وخليتي قرايتك غادي تكعا معايا مكنتش كاع باغي نقولها لك غير مك لله يهديها قالتلك ضروري تهضر معاه. دوز ليا لواليدة سمعتها كتسد لباب وخرجات لشارع عاد هضرات معايا أنا عينيا ديما معطلين عااد بديت كندمع قلييل فين كنبكي حيت عارف بكايا خيب كنبدا نتنخصص. لواليدة عصبتها هيا كتقوليا سكت أنا عاد كنزيد فيه وليت بحال شي دري صغير بنادم غادي فشارع كيبقا يشوف عارف بكايا خايب طلاع فدروج وكنتغبن لالا نجي نجي لواليدة شعلتها ديال بصح وهيا تقطع زعما قطعات باش نسكت زعما أنا عاد زدت فيه غير بوحدي لحال راه كيجبد ومن شحال وأنا كنجمع فيها واحد شويا وهيا تدخل درية لي معايا فدار طبعا غتكون سمعات غواتي من لباب دلعمارة طالعا كتجري شنو واقع؟ مالك؟؟ فين هو لعقل لي يجاوب أنا غير كنحط واحد لخمسة دقايق وهيا تعاود تعيطلي لواليدة جاوبتها قالتلي أداك لبغل واش مزال كتبكي راه هضرنا معاك وباك بفمو كيقولك معندو باس وصافي دير عقلك راه كتفايل عليه صافي عااد فاتني لحال شوف شحال غيدوز تاني باش نعاودها لمهم صافي لواليدة كتحلفلي إلا تزاد عليه لحال غادي تعيطلي تقولها ليا وفنفس لوقت لبنت مزال كتهدر حدايا 100% لواليدة سمعات لهضرة غير لوقت ماشي ديال هاد لموضوع قطعات عاد هضرت مع ختنى قلت ليها بلي لواليد دار كسيدة فلبلاد ومنقدرش نمشي عندو باغيني نبقا نكمل قرايتي..

 لحمد لله ديك ليلة مخدامش حيت معنديش لخاطر بقيت كل ساعة كنعيط على لواليدة كتقوليا وصافي راه لباس عليه واش عارف شحال فساعة سير تنعس والو مبغاش يديني نعاس ديك ليلة مغاديش نغمض عيني حتى نهضر معاه وهو فدار ديك ليوماين معقلتش كيفاش دازت داخل لقسم بارك وبالي فبلاصة أخرى مشيت للخدمة نفس لبلان رونت طوابل سيدة عارفا شنو كين خلاتني رجعت لدار لمهم مرتاحيت شويا حتى عيطت على لواليد وشفتو بارك فدار معمرها تنسالي صافي خاصني نجمع راسي باش نرجع لدارنا بالخف والديا كبرو فالعمر و معرفناش شكون لي سابق يمكن تانا توقع ليا شي حاجة قبل منشوفهم تاني وبعيد اللهم نرجع حدا والديا رجعت لروتين ديال ديما غير دبا خاصني كل نهار فاش نخرج من لخدمة نعيط على دار نسول فيهم واحد سيمانة هكداك وهيا تجي فاش كنقول وهيا تجي كنهدر على سيدة لي غتبدل ياسين لمهم بارك فداك لقسم مع دراري لي كنراجع معاهم وهو يدق لمدير قاليا ياسين واحد دقيقة خرجت لعندو لقيتها واقفا معاه شحاال مشفت شي وحدة من عندنا سلمت عليهم قاليا هاد لبنت جديدة تهلا فيها راه من نفس لبلاد ديالك قلت ليه ممحتاجش توصي سولتها شنو سميتها قالتلي آية جاوبتها بدخلي تفوو صواب مكينش تا سميتي مقلتهاش ليها وغا بدارجة حشوما كاع غير كملنا لحصة خارجين وأنا نمشي عندها قلت ليها نسيت مقلتلك سميتي ياسين ومتشرفين قبيلا كنت ملاهي معارفش شنو كنقول غادين خارجين وكنهدرو درية ماشي بزاف باش جات لهنا سولتها واش دارهم قريبة واش عارفا فاش تركب كنغيرو حنا قالت ليا بعيدة شويا ولكن بابا غادي يجي يوصلني مزال مكملاتهاش وهيا توقف واحد لأودي حديدة ديال بصح قالتلي نشوفك غدا إن شاء الله وتحركات دخلات لطوموبيل يلاه غادي نتحرك تانا لدارنا وهو يهبط واحد لحية من وجهو باينا مغربي قاليا تسنا وقفت ناري ياكما يحسابلو بيني وبين بنتو شي حاجة مبينتش لخلعة وقفت سيد سلم عليا بالحنك قاليا مغربي قلت ليه باينالينا فوجهنا بدا كيوصي فيا درية معارفاش دنية هنا منوصيكش ديرها بحال ختك صغيرة قلت ليه متخافش أعمي وايلي سولني فين ساكن نعتليه بيدي غير قريب هنا قاليا هاديك هيا طريقي طلع نوصلوك غادين فطريق سيد لحية و ضحوكي مطلوووق ماشي بحالهم كيسول فيا وأنا كنجاوب قلت ليه فاش خدام وفين كاري وكدا قاليا مزيان هكدا نبغيك بنادم يتحك محدو صغير تانا فاش جيت هنا كنت..

 وبدااا تيهضر درية من وجها باينا ماشي أول مرة تسمع لقصة غتكون هادي هيا لمرة الألف هبطت غادي طالع وهو يكلاكسوني هبط جاج شيرلي بيدو بسلامة تا ولله تا يولي نسيبي هدا مغنزكلوش وايلي لباس عليه ضحوكي ومصواب لمهم لغد ليه خارج على ودها بكري من دار دخلت جبت دورة عالمية فديك لجامعة حتى لقيتها دايز من قدامها زعما مشفتهاش وهيا تعيط عليا سلام سلام سولتها واش داخلا دبا قالتلي لا زعمت وعرضتها نشربو شي حاجة أول مرة نزعم على شي درية كون قالت لا غادي تعقدني.. خرجنا لواحد لمحل تما باركين وهيا تقولي راك معروض عندنا ليوم لعشا قالي بابا لبارح نعرض علك.. صافي نسيبي هدا خليتها باركا وخرجت عيطت على سيدة لي خدام عندها فلمحل علمتها بلي مغاديش نجي عندي مراجعة قالت ليا خود راحتك ها باش كتعجبني مكتقولش ليا لا.. 

رجعت لداخل بارك مع درية وأخيرا مبقيناش محنسرين فموضوع من سيريات لأفلام لمزيكا تاهيا طلعات مبليا بحالي لي وشكوون كيوقف علينا ديك لعوجة لي كنت كنتريني بخوها ناريي سيدة أنا نكون بوحدي ونحشم نتلاقا بيها أخر مرة كميت معاها مبقيت عاقل على والو غير واحد 15% من داكشي لي درنا ديك ليلة وغير ديك 15% شاك فيها شراتلي بلاصة (VIP) فجهنم أنا درت بحالا مكين والو سلام سلام قلبت لموضوع سولتها على خوها بنت لعبد وهيا تدورها فلبلاصة تاني قتلتلي مالك غبرتي توحشناك مزال عندي شي تصاور مخاصكش تزكلهم حل تيليفونك نلوحلك. وأنا نخنزر كانو عندي نفس تصاور ومسحتهم فهمي راسك بنت لعبد قالت ليا وخا غير سلملي معاك على كريستينا غنكون مساليا وندوز لعندكم معرفتش كيفاش تحكمت فراسي كنت باغي نحط ليها شي مسمنة نييت وخا نعرف ندوز على مها لحبس هاد نوع مخطا تا بلاد لله يستر لحمد لله درية زركة فلونغلي مفهماتش نص دلهضرة بقينا داويين شويا ومشات تسنا باها غيجي يديها تاني عطاتني لعنوان غير من لإسم عرفت لبلاصة ساكنين فحي ساكن فيه غير شكون وشكون تما أبا دجاجة بكامونها هادي لواحد يمشي لدار يلاه يدوش ويراجع لهضرة لي خاصو يقول.. 

طبعا غير دخلت لدار وهيا تسولني كريستينا شكون هاديك لي كنتي بارك معاها ليوم وصلاتها لخبار أنا عارف لأخرى عشيرتها غتوصلها ليا ولكن ماشي بهاد زربة معطلاتنيش.. 

طلقتها عليها راه غير من لعائلة وبقيت كنراجع معاها أهيا ولات كتغير وخا مبيناتنا والو هاح راني غير حاكر راسي. عشيا قلت ليها بلي غادي لخدمة وخرجت شديت طاكسي قربنا لداك شارع وهو يصوني تيليفون نمرة نوح هادي..(يتبع2k)