لحك وغطاه الجزء الحادي عشر

لحك وغطاه  الجزء الحادي عشر

لحك وغطاه  الجزء الحادي عشر

لمهم خونا جا لعندي تاني برجليه كونما قدام لجامعة ومباغيش نخصر وجهي مع لإدارة مغاديش نخليه يضهر غادي نشعل معاه ولكن جا فوقت ماشي حتال لهيه وقفت معاه سلام سلام سولني كيف بقيت شحال داز باش تضربت عااد تفكرني قلت ليه مزيان وسكت غير شفتو كيتمتم ومعارفش باش يبدا عرفتو باغي شي حاجة قلت ليه هضر بزربا معنديش وقت قاليا صافي ملي معندكش وقت حتال من بعد وندوز لعندك ونهضرو، جيتو نيشان مباغيش نعاود نشوف وجهك مرة أخرى عطيني لمفيد دبا وختاصر شنو باغي؟ قاليا سمعت بلي رجعتي لخدمتك لقديمة وخدمة أخرى هنا قلت يمكن محتاج فلوس جيت نعرضك ترجع لخدمتك فلصال ومعايا كيف لول.. خونا وجهو قاصح غلباتني ضحكة يحسابلي واش كيضحك خليتو واقف ودخلت راه باين لجواب ديالي لحمي مزال زرك من لقتلة لي شرالي بلعاني وجاي باغينا نرجعو كيف لول مهبول هدا..

 قبل مندخل نقرا كان خاصني ندير واحد تيليفون ضروري لديك بنت ناس لي ساكنا معايا كين واحد لي عارفني رجعت للخدمة وعارف بهاد لخدمة لي مزال حتى مبديتهاش وبنت لعبد قالتلي بلي مبقاوش كيهدرو سيد طلع عارف عليا كلشي بحالا بايت معايا دخلت لحمام عيطت ليها سبيت ليها لعروق هادي هيا مبقيتوش كتهدرو. قطعت مخليتهاش تهضر دخلت كملت لحصص لي عندي ودخلت لديك لقاعة لي قادو كنتسنا فولاد ناس لي غادي نخدم معاهم على لغة بارك شاد تيلي كنجاوب فديك خيتي تقلاتلي تيلي بالمساجات قالتلي راه هضرات معاه غير لبارح وقاليها بلي باغيني نرجع نخدم معاه مشا عندها هيا زعما باش تهضر معايا وهيا تقوليه بلي ممحتاجش شي خدمة وبلي خدام.. يلاه غنجاوبها وهو يدخل واحد دري هضر بالعربية قاليا ياسين؟ مرحبا دخل من لهجتو عرفتو مصري فاتت نص ساعة لولا وغير هو لي جا صافي بديت كنهدر أنا وياه خونا مناقص عليا بوالو من غير لهجة وكيتعكل فالهضرة بقينا داوين حتى حل واحد تونسي لباب لعرب اخويا مكيدقوش بقينا ب3 داك نهار كملنا ديك ساعتين دويت مع لمدير صافي زوج قاليا بلي مزاال جاي بنادم. خارج زربان خاصني نمشي لدار نبدل نقصي ونتحرك لخدمة دبصح فرشتها هادشي بزااف عليا أنا أصلا معكاز، لمهم لفاس طاح فراس غادي زربان وصلت لدار نوح واقف تحت دار بطوموبيلتو كيتسناني فلبلاصة بدا داوي حنا راه متعادلين أنا فرشتها بداكشي لي درت ونتا خديتيلي عشيرتي. مخليتوش حتى يكملها خديتلك؟ سيدة راه جات بخاطرها وطلباتني باش تبقا حيت شافت حالتي كيف كانت بسبابك صاحبي زعما..

 أنا طالع فدروج وهو تابعني حتى دخلنا لدار مغاديش نحبسو معنديش لوقت لي نضيع لمهم لبنت مزال مجاتش لدار بدلت حوايجي وهو داوي أنا غير ساكت سديت لباب هابطين مزال تيهضر قلت ليه واش صافي مبقا حتى واحد عندو يدين فهاد لمدينة سير قلب على شي واحد أخر وفيناهو صاحبك لي ضربني ولا خوا بك قاليا عملاق وشافوه شنو دارلك وكاع لي لعبو معاه حتى واحد مبقى كيزعم يلعب معاه كنمشيو كنبقاو غير مسمرين نتا حاجة أخرى بنادم كيشوفك صغير كيحڭرك.. واقف فشارع كنتسنا طاكسي قاليا يلاه نوصلك جاوبتو غير شكرا وجوابي هو لا ومعمرو غيتبدل نتا دبحتي وكليتي دجاجة لي كتبيضلك كل ليلة بيضة متسناهاش تعاود تبيضلك منبعد..

 خليتو وطلعت فطاكسي مشيت لخدمتي داك نهار لمحل عامر معرفتش كيفاش دازت ليلة بيخير ومخلطتش لماكلا ديال طوابل راجع لدار على رجليا لواحد يتمشى غير شويا يسمع لعضامو داخل معطاال كيبانلي ضو مزال شاعل ختنى مزال فيقا عندي سوارتي حليت لباب لقيت ختنى كتسناني بطابلا ديال لعشا عارفا راسها فرشاتها معايا دخلت بدلت حوايجي مهضرتش حتى سولاتني واش مزال مقلق أه سيد عارفاه شنو دايرلي ومشيتي عاودتيلو فين خدام وشنو كندير بقالك غير تعطيه ضوبل دسوارت دار وصافي.. بقينا مناقشين شويا حتى سكتاتني سيدة موجدالي عشا وكتسناني أنا راه نقطة ضعفي كرشي وجدلي غا منخشي فوجهي وديني بحوايجي لمهم ليلة حمراء أخرى راه قلتها لمرة لي فاتت أنا إلا معرضاتش عليا والله ما نهضر كنحشمو جنا أويلي. لغد ليه مقاريش ومخدامش فليل كان خاصني نمشي نشوف غير دوك دراري لي عطاني لمدير نخدم معاهم غير تغدينا وخرجت.. بارك فداك صال كنتسنا فيهم وهوما يجيو دوك زوج دلبارح هوما لولين بارك تنهضر معاهم كيبالي غنبقاو غير ب3 حتى ليوم يمكن مزال مكملتهاش بنادم بدا كيدخل لكراسي عمرو بنادم معمري شفتو وزربو عليا دخلو فدقة مبقيتش عارف شنو نقول أنا راه كنحشم لمهم نهار لول غير داوين باش نعرفهم واش ناقصين فشي حاجة ونقدر نعاونهم بداكشي لي عندي ولالا ديك ساعتين طارت خرجنا واحد زوج مغاربة كيتمشاو معايا لبرى داوين بدارجة سااط خاصنا نبداو نخرجو مع بعضياتنا ونتعاونو.. 

عطيتهم نمرتي وراسي خاوي من داك سوق أنا مبقاش خاصني بصحاب مورا هادشي لي وقعلي معاهم كيما كتقول لواليدة مكين غير راسي يا راسي غير قربت لدار وهيا تصوني ليا وقفت جاوبتها سلام سلام قالتلي باك باغي يهدر معاك صافي عرفت بلي شي حاجة واقعا لواليدة تعيطلي ومتسولنيش كيف داير وباش معشي لبارح وشنو لابس لالا ماشي ديالها هادي دوزاتلي لواليد وماشي صوتو هداك مبدل بزاف كنسول فيه مالك كيقوليا غير شويا دلبرد وصافي كيفاش لبرد أنا عارف لواليدة مغاديش تعيطلي هكدا إلا مكانتش شي حاجة خيبة حلفت ليه وما هضر حتى نجمع حوايجي دبا قاليا راه والو غير درت واحد لكسيدة صغيرة..(يتبع)