لحك وغطاه الجزء التالت عشر

لحك وغطاه  الجزء التالت  عشر

لحك وغطاه  الجزء التالت  عشر

لمهم غادي عند نسيب لمستقبلي غير قربت لدار وهو يصونيلي نوح مجاوبتوش مفيا ميهضر معاه درت تيلي فجيبي وقصدت دار خوتنا كنصوني فلباب ديال دار وهو يجاوبني لحية قلت ليه أنا ياسين من. مخلانيش نكملها قاليا مرحبا دفع لباب ودخل داكشي لي درت دارهم مصرووعا بجهد أنا عايش فقفص زعما ميعطيونيش شي بيت نعيش معاهم حسي ميخرجش. لمهم تلاقيت بيه سلام سلام دخلنا لواحد صالون باركين غير بزوج لا بنتو لا مرتو أنا قلت صافي لحية غير كنت غالط فيه طلع كيغير مزير لقدية رجال بوحدهم ونسا بوحدهم غنتعشاو راس فراس بحال شي هوامل زمعا بنتو راه طالقا شعر والله أعلم أنا راه داوي معاه وكندور هادشي فدماغي فنفس لوقت سيد كينصح فيا شوف نصحك بتجارة حلال وفيها لبركة ناري هاد لحاية كيموتو على لبيع وشرا أرا شي ملابس داخلية واكسسوارات وعطور هنا ولكن سيد ملعق بروجولا..

 مزال داوين وهيا تدخل مراتو سيدة مبشورة عاد عرفت درية لمن طالعا معرفتش واش نقول غير سلام ولا نمد يدي ولا شندير راجلها حدايا نخاف تضربها ليا لشي قمعة وناوي نتناسب معاهم زعما عمرها تنسالي سيدة وهيا تهنيني مداتلي يدها سلام ولدي بيخير؟ لحمد لله صافي أنا عجبوني لوالدين كتر من درية وخا تكون كوفرة فلغيس قابل عليها مزال مبركاتش مها وهيا تدخل سلمات عليا وباركين كنهضرو مجموعين كنعاود ليهم على دار سيد طلع كان غير قريب لبلاصة لي فيها دارنا نعتليه درب صدقات بنت عمو ساكنا فنفس درب وسيدة فاش نعتلي دار ووصفها ليا طلعت كنعرفها ديك سلام سلام فدرب وصافي وخا ماشي شي حاجة ولكن راه فشكل حنا لمغاربة ضروري فاش نتلاقاو بشي واحد جديد نلقاو شي صلة قرابة وخا تكون ريحة شحمة فشاقور لا ماشي خويا ولكن كنعرفو ولد عمو واخد بنت خالت واحد سيد كيتقدا من لحانوة لي كنتقدا منو..

 لمهم أتاي لفقاص لحلاوي ديالنا شي لعيبات شحاال مكليتهم وباش زادتو صدموني دايرين كسكسو أنا راه كنشرب فأتاي ونيفي شم ريحة لفوار جايا من لكوزينة وسمن دموع كانو غادين يطيحو. لمهم من أحسن ليالي لي دوزت فديك لوقيتا خارج من عندهم سيد حلف تيوصلني لدار وصلنا لدار كيباليا ضو طافي فدار قلت صافي خيتي خارجا لعند مها ولا مع شي صحاباتها قلت ليه طلع تشوف دار لي كاري وتشرب شي حاجة مجاتش نخليه جاي راجع فلبلاصة.. قاليا مرحبا طالعين وكنطلب زهري ياربي متكون مخليا لا صاك لا والو برا لبيت يا ربي أصلا أنا حمار ملقيت فاش ندير صواب لمهم دخلنا لدار سيدة جامعا دار منقياها سيد قاليا تبارك الله علك نقا هو أهم حاجة قلت ليه فخاطري خاصك تجي فاش كنت أنا وداك دري برب تا تضربك ريحة لغمل من دروج برك شويا وهبط وصلتو لطوموبيل مدلي كارطا ديالو فيها نمرتو وسميتو براهيم مجبداا ضربتها فبزطامي وطلعت لدار نقصي شي حاجة وننعس كسكسو راه غير كدبة كنكدبو بيها على لمعدة لمهم قصيت يلاه غنحط راسي سمعت لباب طبعا منضتش غتكون غير لبنت رجعات بقست ناعس حتى دقات عليا فلباب دلبيت قالت ليا ياسين وخا تخرج عندنا واحد دقيقة؟ بلاتي كيفاش *عندنا*؟ قلت صافي هدا نوح حولو عيط ليا قبيلا حليت لباب لقيتها هيا وديك صاحبتها لعوجة سلام سلام قالولي أجي برك معانا شويا إلا قديتي. أنا راه عيان وفيا لموت دنعاس ولكن أامبوستاحيل نقول لا باركين ديك لعوجة جبدات كتبرم فواحد جوان تاني، راه كنقولها عوجة غير حيت كنقارنها مع كريستينا أما تا هيا راه مبيهاش كون كانت فواحد لبلاد نسيت سميتها كون راه عندها كونط إنستغرام فايت لمليون وغالبا غتلاح لراب ولا الواي واي وغتحكم طوندونس.

 لمهم معلينا باركين بداو كيدورو فداك جوان أنا غير كنخمم واش ناخد ولالا أخر مرة جربت على بونة كنت غادي نحماق شحال من واحد سبابو جوان زعما راه قلنا غنديرو عقلنا مداتلي ختنا جوان قلت ليها لالا حرام منديش معاكم سيئات على ود دخان ختنا وهيا تبقا كتجقر فيا لا والو بغينا ندوزو ليلة زوينة وبحال شحال هادي غير نترة لولا صافي فقدتهم عندهم حشيش دياال بصح خليني من طابة ديالنا مفقتش حتال لغد ليه لقيت راسي ضارب بينوار ديال ختنا منو للحمي وناعس فالأرض غادي لحمام باغي نحل لباب كيبانو ليا ظفاري فلوردي ناريييييي شرف ورجولة ضاعو صافي غير ندوز موس على روحي صباعي كاملين حتى من رجليا كنقلب على خياتنا ملقيتهمش فدار صونيتلها وهيا تجاوبني غير جاوبتا بديت كنسب فيها وتخايل معايا واقف ببينوار حمر فيه وريدات ومقاد مع شرجم كيطل على شارع وكنعرعر عليها سولتها فيناهيا مجاوباتنيش قالت ليا نتا هادشي كامل درتيه غير على ود ظفران ملي غتعرفنا شنو درنا منعرف شنو غدير.

 عرفتي باش قالتها قطعات أنا تخلعت أغوتي ناري وليت خايف نشوف لتحت زعما يكونو حيدو ليا شي لعبة كلشي فبلاصتو كيما خليتو ناري دخلني شك كندوش باش نخرج نمشي لعند شي طبيب يقلبنا اللهم نتشوهو مع طبيب ولا نوليو نادمين من هنا لقدام يلاه كنبدل فحوايجي وهو يوصلني مساج هاد لمرة من عند نوح كيباليا لمساج فيه غير تصويرا مزال مشفتهاش بحالا علمني الله غتكون شي تصويرا ديالي فشي حالة ماشي تال لهيه لبارح وداكشي لي كين خونا مكتب عليها والو صافي لا تعليق أنا لي خاص نهضر قلت ليه مفهمتش كيفاش شنو هاد ضحك قاليا هانتا قلتيها هادشي غير ضحك كنضحكو معاك وصلوني بزااف ديال تصاور بحال هادي وشي فيديوهات أه ونمرة كتبدا ب(212+) معرفتش واش نخلي ماليها حتى هوما يضحكو معانا ولالا نبقاو نضحكو غير بيناتنا. خونا عندو نمرة والديا ريق صافي وحل ليا مبقيتش عارف شنو نقول هادشي لي كانت كتقصد ختنى ب "ملي غتعرفنا شنو درنا منعرف شنو غدير" بروجولا صرعوني داوي معاه وكنفكر نخرج لعند لبوليس هادا راه تهديد ولكن نخاف نخرج معاه للعيب يولي مصيفط تصاور لدار ولا شي واحد فصحابو بقيت داير معاه لخاطر قلت ليه دبا شنو؟ قالي بحال ديما عشيا نشوفك فلصال أه ومسح نمرة كريستينا متعاودش تعيط ليها. وهادي تخويرة سانك سانك سيد باينا باغيني نرجع نخدم معاه وهاد لمرة موحال واش يعطيني شي ريال سيد يقدر يخرجلي على حياتي بمساج واحد لواليد إلا شاف ديك تصويرا يقدر يسكتليه لقلب..

 دخلت للبيت لي كنت عاطي لختنا لقيت حوايجها مكبنينش خلات لبينوار لي صبحت فيه لا غير يمكن غير ملقاتش كيفاش دوز ليه تحيدولي خافتني لا نفيق ركابي خواو وابلااان هو ضارني راسي دبا غير واش كانت ناويا على هادشي من نهار حات ولا مورا ما جات عاد طاحت عليهم هاد لخطة شيطانية شيطان ومطيحش عليه بصراحة حتى أنا بغل مدرت فيها ميصلاح دبا عندهم تصاور خداو نمرة دارنا من تيليفوني صافي مبقا عندي مندير منغير أنني نطير لدارنا نشد تيليفون لواليدة ولواليد نخبطهم مع الأرض ونهرس لاكارطات بارك كنخمم واش نضحك ولا نبكي وهيا تباليا واحد لقريعة صغيرة حداها قطن ختنا خلاتلي باش نحيد صباغة بنت لعبد شيطانة ولكن بضمير بارك تنحيد فديك صباغة داك نهار معمرو يتنسى حتى قاديت أموري وبديت عايش مزيان شوف فين وليت دموع دموع كنمسح فصباغة وكنضرب على تصويرة وكنهرنط وا فكها يامن وحلتيها رجولة صافي راحت فكلام فاحش..(يتبع)